Ngipiang Ipian

Sawai-wai sabilang teduhné matimpal kopi tekén roko abongkos, ia negak di teras umahné ngrumus ngitungang nomor ané lakar pesu petengé sing kecag buku 1001 tafsir mimpiné di sampingné. Karana yén nuju ia maitungan nepukin ada ané sénglad bedik pasti ia ngungkabin tur maca buku tafsir 1001 mimpiné, lantas cateta di kertasé suba kéto nomoré lakar pasanga. Adané dogén judi, harapan menang ada, kalahné suba pasti. Uli jaman iluné Madé ngalih uleh-ulehan di ipian tusing taén nekaang pipis, begbeg alih bati ilang kamulan.

Madé Putra nu truna, tuuhné 25 tiban. Nanging ia suba ngelah gagéen luwung, dadi pengacara, pengangguran banyak acara. Apa kadén gaéna, bangun semengan, mandus, makan, mesu ling umahné setata mulihné peteng. Pangakuné ngindeng ngejang lamaran di kantor, toko, lan réstoran. Suba telung bulan pangakuné kakéto tekén méméné, nanging tusing tawangae panakné ngindeng ngajak timpalné. Semengan nganggur di dagang soto betén bingin dauh tukad désané, tengainé masaré di jumah timpalné, teduh bangun suba ngrumus ngetékin togél, buin ngitungang ipian.

Asal suba ngrumus jeg cara Profésor Matematika, ngisiang potlot aéng tekekné. Paningalané tegteg ningalin syair, andus rokoné klebis-klebis tusing pegat nang abedik. Yén suba pragat ngrumus ia negak bengong sambilanga nyiup kopi di warung sotoné ento. Yén anaké lén sing tawang kadénanga I Madé buduh. Bengong sing karuan unduk, nanging dagang sotoné, Mé Brayut suba apal pesan. Yén kéto tegakné pasti nu makeneh, nginget-ngingetang ipianné ibi sanja. Yén suba ingetanga lantas cocokanga di buku 1001 tafsir mimpiné. Suud ngurusang togél, malali jumah timpalné. Ngorta, matuakan mantas 2 gelas sambilanga ngantiang nomor togélé lakar pesu.

“Duh, bedagé. Buin abedik nomor icangé nebekin. Duh, Bhatara Kala,” kéto abetné maca SMS uli bandar togélé. Lén buin 1 angka dogén ukana maan pipis 20 juta. Jani buin sajan-sajan ilang kamulan.

“Cai Dé, suba tawang ibané tengi, nu doén meli nomor. Suud meli nomor adekan cai tabung pipisé anggo bekel ngantén buin puan.”

“Jeg siepan ibané Tut. Cai di kétoné mulan paling suciné. Wak té masih demen matajén, awaian ngecel siap doén gaéné, tunangan anggurin sing taén cai gecel. Hahaha.”

“Nah nah, Tut, Dé. Sing kéné sing kéto, cai jak dua mulana patuh demen mamotoh. Beneh masih ané orahanga tekén I Gedé, Tut. Apa ké cai sing lakar ngantén? Umur suba ngangsan wayah, nu doén cai gliang-glieng kemu mai sing karuan unduk, padalem méméné, alihang cucu kéto. Hahaha.”

“Cai Man, demen sajan cai ngwalék timpal. Nah cenik gaé ento, akijapan mata maan cang nak luh bodyné cara gitar Spanyol, bahénol, tur genyol-genyol. Hahaha.”

“Nah Dé, ci doén ba nawang.”

Suba karasa peteng, Madé mulihné. Apang tusing tawanga suud matuakan, ia mandus nglaut ditu sig I Ketut apang siliban bedik bon tuakné. Suba kéto, lantas ia majalan mulih. Engsap ia jani magpagang Kajeng Kliwon, jalan mulihné nak ngliwatin telabah. Di sisin telabahé bek ada punyan kayu gedé. Nanging rasananga ia tusing taén ningalin punyan Pulé gedé. 

“Ngujang bisa ada punyan Pulé dini? Aidupan icang sing taén ningalin punyan Pulé dini. Apabuin tua sajan ngenahné punyan kayuné.”

“Dé, Madé Putra. Mai paekin Kaki!”

Alih-alihina tekén I Madé ané nyeritin adané. Tepukina punyan Puléné misi mua, ento ané mamunyi itunian. Ia lantas malaib benceng sajan kerana kaliwat jejeh. Neked jumahné angkihané ngangsur. Lantas ia ngojog balé tur masaré nyaruang takutné. Sirepné ngengkis kanti semengan. Mara bangun ia nyagjagin méméné. 

“Mé, ibi peteng yang nepukin punyan Pulé gedé ngidayang ngomong di sisin telabahé.”

“Aruh, dija ada punyan Pulé ditu? Men ngujang cai kemu? Dong kemu doén ja gagaén cainé, Dé? Ngaku ngejang lamaran, malali kéto cai makapeteng?”

“Sing kéto mé, nak butuh refreshing adané, malali sig umahné Ketut kadong tepuk té, mé.”

“Mémé sing ngugu, pasti cai sai-sai kemu, ngakuné kéné kéto. Nyandang engkah cainé mabo tuak sabilang mulih peteng. Kéné gagaén cainé. Punyan Pulé alasané, kéto suba men mulih punyah.”

“Sing mé, seken tepuk punyan Pulé gedé, sada ngomong.”

“Aduh, nah kénkén ja ditu, mémé lakar manting malu. Sing maan ngrunguang nak punyah.”

Sanjané I Madé buin ka umahné Ketut. Ditu buin ngrumus, ngitungang togél ngulehang ipiané. Inget ia tekén ané tingalina ibi sanja. Lantas orahanga tekén I Ketut. Kakiné Ketut nyautin, “Punyan Pulené ento mula ada nanging sing sai-sai. Ia adané Kaki Pulé, yén ngidih ditu pasti bakat. Nanging ingetang ada madan Rwa Bhinéda,” kéto pabesen I Kaki.

Ningeh pitutur Kakiné Ketut, Madé ngelah keneh lakar nunas ica ditu apang sai-sai menang manomeran. Petengné ia mulih, tusing nepukin punyan Puléné ento. Pocol petengé ento ia ngantiang kanti jam roras. Mulih lantas ia. Nuju pamagpagan Kajeng Kliwon buin ia ka tongosé ento, nyén nawang nepukin punyan Puléné. Pidan ia nepukin dugas pamagpagan. Jeg ngenén sajan, tepukina ada punyan Pulé gedé tua, paekina lantas tekén Madé.

“Kaki, Kaki Pulé. Sampun suwé titiang mamotoh togél, nanging nénten naen menang. Mangkin tiang nunas mangda prasida ané ipiang tiang yukti ngarya tiang menang.”

“Nah, Madé bagus. Jani Madé mulih tur masaré!”

Mani semengané mara bangun Madé nyemak kertas ajak potlot. Girang sajan ia krana ibi sanja man ngipi, mirib jani lakar menang ulian ipiané ento. Ngénggalang ia meli nomor. Marencana jani tusing lakar pesu, ia nu ngantiang pamesun nomor togélé lewat SMS. 

“Yés, 9126. Ngukup. Mé, icang ngukup 20 juta, mé.”

“Ngukup apa?”

“Nomor mé.”

“Pih cai, nah aget. Rejeki to adané.”

Sajan Made ngukup 20 juta petengé ento. Nanging suudan ento méméné gelem. Suba abulan tusing seger. Kanti telah pipis ukupané 20 juta anggona ngubadang tusing masih ngidayang seger. Kanti méméné ngemasin ngalahin gumi.

Ngeling lantas Madé kanti leleh tur nyriep. Di ipiané ia matemu Kaki Pulé. Ia ngeling ulian méméné ngemasin mati.

“Madé bagus, Madé ngidih apang ipiané ngaé menang. Jani Madé suba menang. Ané ipiang dadi seken. Madé ugan ento ngipi nak sakit, jani mémén Madéné sakit, tur tusing ngidang tulungin.” 7